Astoáiggevejolašvuođat

Beavdetennis

Studeanttaide čálgofálaldagat

 

Gievrudanlatnja

Diehtosiidda gievrudanlatnja lea rabas buot Sámi allaskuvlla studeanttaide ja Diehtosiidda bargiide. Rahpanáiggit leat 06.00-23.30, muhto dárbbašat fal čoavddagoartta. Loga eanet SSO interneahttasiiddin.

Sávdnji
Diehtosiiddas sáhtát maid sávnnjodit. Diehtosiidda sávnnjit leat gievrudanlanja molssodanlanjain.

Hárjehallan Báktehárjjis
Hárjehallandiimmut Báktehárjjis juolluduvvot jahkásaččat servviide.
Sihke studeanttat ja bargit Sámi allaskuvllas sáhttet hárjehallat Báktehárjji hállas.

Vuojadeapmi

  • Vuojadandiimmut 2017/2018 leat mánnodagaid 19:00 - 20:00.

Sámi allaskuvlla studeanttat ja bargit lávejit sáhttit vuojadit Guovdageainnu mánáidskuvlla vuojadanhállas. Molssodanlanjat leat juhkon čuovvovaččat: Gurutbeale latnja, go tráhpás olle bajás lea - dievdoolbmuide párralohkovahkuid ja nissonolbmuide leaskalohkovahkuid. Dat lea vai nissonolbmot/dievdoolbmot besset sávdni geavahit juohke nuppi vahku. Go diibmu lea nohkan de galgá eret čázis ja molssodanlanjas geargan maŋimus 15 minuhtta maŋŋel go diibmu lea nohkan. Nu ládje besset buohkat geavahit vuojadandiimmuid ollislaččat. Jus áiggit ja njuolggadusat eai čuvvojuvvo de sáhttá dieđihit suohkanii dehe Sámi allaskuvlii. Sámi allaskuvla dehe Guovdageainnu suohkan eai ovddasvástit geavaheddjiid árvodávviriid.

Stuollu mii ruvve
Diehtosiiddas lea sierra stuollu mii ruvve rupmaša. Dát lea fálaldat buot Diehtosiidda bargiide ja Sámi allaskuvlla studeanttaide

Kantiidna
Kantiidna lea rabas buohkaide ja dáppe oaččut oastit dábálaš lunšša ja liegga biepmu juohke beaivvi. Loga eambbo SSO interneahttasiidduin.
Fuomáš: Bargit ja studeanttat ožžot láigohit kantiinna sierra doaluide, nugo konfirmašuvnnaide. Geahča njuolggadusaid dákko.

Girjerájus
Sámi allaskuvlla girjerájus lea rabas buohkaide. Rahpanáiggit leat mánnodagas bearjadahkii  
dii. 09:00-15:30. Loga eanet girjerádjosa interneahttasiidduin.  

Luoikkahit lávu, fatnasa ja eará meahcástandávviriid
Sámi allaskuvlla bargit ja studeanttat sáhttet luoikat meahcástandávviriid nugo lávu, dulljiid, fatnasa oktan mutuvrrain, gálvojorri biilii ja kánuid. Diehtosiidda ovdakantuvra diehtá eambbo ja hálddaša luoikkaheami.

Biilamohtorliggenrusttegat
Diehtosiida fállá bargiide ja studeanttaide vejolašvuođa oastit elfámu biilamohtorliggenrusttegiidda. Elfámu gávdná stoalppuin parkerensajis ja daidda dárbbašuvvo sierra čoavdda. Elfápmu jáddaduvvo automáhtalaččat go šaddá bivvalet go 10 buolašgráda. Sáhttá oastit elfámu juogo olles dálvái dahje dušše beallái. Ovdakantuvra hálddaša mohtorliggenfálaldaga.

Jus dieđát eambbo čálgofálaldagaid birra, dieđit áinnas diehtojuohkinkonsulentii.