Jođihišgoahtá goađi
Sámi allaskuvlla stivra lea virgádan Marit Meløy goahtejođiheaddjin jahkemearrevirgái
Giela, duoji, boazodoalu ja servodatdiehtagiid goahtái 1.1.18 rájes 31.12.21 rádjái.
Lea vuosttaš geardde go Sámi allaskuvla virgáda goahtejođiheddjiid. Ovdal leat goahtejođiheaddjit válljejuvvon. Dát čuovvu ge ođđa goahtestrukturproseassa man stivra lea mearridan.
Marit Meløy bargá dal seniorráđđeaddin boazodoalloáššiin Sámedikkis. Sámi allaskuvllas son lea ovdal bargan dutkankonsuleantan, oahpporáđđeaddin ja oahppohoavdan. Sus lea mastergráda servodatplánemis Romssa Universitehtas. Masterbargu boazodoallofáttás, boazosámi nissonolbmuid birra.
Ođđajagimánu rájis Sámi allaskuvllas leat guokte goađi,
Giela, duoji, boazodoalu ja servodatdiehtagiid goahti man Marit Meløy jođiha ja
Sámi oahpaheaddjeoahpuid ja álgoálbmotjournalistihka goahti man Seija Risten Somby jođiha.
