Ođđa dutkan loktešii autismma sámi perspektiivvaid
Norgga dutkanráđđi lea juolludan badjel 11 miljovnna ruvnno dutkanprošektii Sámi Experiences of Autism (SEA). Prošeakta, maid professor Anne Lindblom Innlandet Universitehtas jođiha, guorahallá mot autisma vásihuvvo ja áddejuvvo sámi servodagas.
Ulbmil lea ovddidit sámi erenoamáš ja kultuvrralaččat relevánta doarjjamodeallaid mánáide ja nuoraide autismaspekteris, ja sin bearrašiidda. Prošeakta lea ovttasbargu Sámi allaskuvllain, mas vuosttašamanueansa Ylva Jannok Nutti jođiha bargopáhka.
- Mii háliidit leat mielde buvttadeamen ođđa máhtu mii hástala oarjemáilmmi ja kolonialisttalaš áddejumi autismmas, ja mas vuolggasadjin leat sámi vuogit diehtit, leahkit ja dahkat, dadjá prošeaktajođiheaddji Anne Lindblom.
-Dá lea dehálaš dutkansuorgi ja lea unnán diehtu sámegielat ja sápmelaš mánáin geain lea autisma. Dákkár ovttasbarggut nannejit Sámi allaskuvllas dutkanviidodaga, dadjá Sámi allaskuvlla rektor Liv Inger Somby.
Prošeakta galgá maiddái ovdánahttit álgoálbmotdutkanvugiid ja nannet sámi jienaid akademiijain ja suokkardit hutkás vugiid movt sámi nuorat sáhttet ovdanbuktit ja oažžut iežaset jiena gullot.
Okta stipendiáhtavirgi almmuhuvvo oassin prošektii, ja viiddis gaskkusteapmi plánejuvvo sihke sámi birrasiin ja fágalaš forain. Lindblom lea mielde fierpmádagas, mas leat riikkaidgaskasaš álgoálbmotdutkit, geat čalmmustahttet autismma álgoálbmotperspektiivvaid ja vásáhusaid, nu ahte dutkamis lea vejolašvuohta oažžut mearkkašumi maiddái globála dutkanbirrasiin.
- Dehálaš lea ahte mii ráhkadit doarjjaortnegiid ja oahpahusvugiid mat duođas speadjalastet sámi mánáid duohtavuođa ja árvvuid, dadjá Ylva Jannok Nutti.
