Ohcat ođđa ofelaččaid
Disdaga 15. b. cuoŋománus lea maŋemus áigemearri ohcat sámi ofelažžan oahppojahkái 2025- 2026. Dán jagi bártnit erenoamážiid ávžžuhuvvojit ohcat.
Juohke jagi sámi ofelaččat mátkkoštit birra Norgga ja dollet ovdanbuktimiid nuoraide sámi kultuvrra ja servodateallima birra.
Dálá ofelašjoavku lea fargga geargame iežas oahpuin ja ofelašdoaimmain, ja Sámi allaskuvla ohcá dál guhtta ođđa sámi nuora dán dehálaš ja gelddolaš doibmii.
- Sámi ofelašjagis lean oahppan hui olu! Lean oahppan hupmat eanet olbmuid ovddabealde go goassege ledjen jáhkkán nagodit, johtán buot lágan báikkiin Norggas, ja deháleamos lea go lean beassat hupmat sihke ohppiiguin ja oahpaheddjiiguin fáttáid birra main mun duođain beroštan, dadjá ofelaš Benedikte Kristin Hansen-Seljebu (19) Ávágis eret, gii oalle fargga lea geargame ofelažžan.
Sus ja dan viđa eará ofelaččas geat gerget oahpuin ja ofelašdoaimmain geassemánus, leat dán jagi oktiibuot 130 skuvlla mátkkoštanplánas, gos dušše golbma lulimus fylkka galledeamit leat vel báhcán. Su mátkkoštanguoimmis Mariela Nordsletta Sombys (19) leat maid leamaš erenoamáš vásáhusat ofelažžan.
- Maŋimuš jahkebeali lean orron rukses koaffaris ja lean beassan johtit máilmmi buoremus mátkkoštanguimmiiguin fárrolaga! Dasa lassin leat buot nuorat geaid leat galledan vuostáiváldán min bures, mii duođaid lea čábbát ivdnen mu ofelašárgabeaivvi! dadjá son duhtavaččat.
Diibmá lasihuvvui ofelašlohku njealji ofelaččas guđa ofelažžii gokčan dihte skuvllaid dárbbu dieđuide sámi kultuvrra ja servodateallima birra. Dat guhtta ofelašnieidda geat geasset gerget ofelažžan, ávžžuhit erenoamážiid bártniid ohcat.
Jus áiggošit šaddat ofelažžan, de fertet leat sámi nuorra gaskal 18-25 jagi ja dus ferte leat oppalaš lohkangelbbolašvuohta. Sámi ofelaččat olahit 30 oahppočuoggá oahppojagis, ja boahtte jahkái stipeanda lea lasihuvvon 230.000 ruvdnui. Dasa lassin ofelaččat ožžot nuvttá studeantaorrunsaji go čađahit oahpahusáigodaga Guovdageainnus.
ohcanskovi gávnnat dás: Søknadsskjema samiske veivisere - Nettskjema
Jus háliidat eanet dieđuid, váldde áinnas oktavuođa ráđđeaddiiguin sámi ofelašdoaimmas Sámi allaskuvllas:
Seniorráđđeaddi Lena Susanne Gaup, +47 466 28496 dahje ráđđeaddi Marie Kvernmo, +47 412 75 171.
