Professor Harald Gaski vuostáiválddii Ubmi universitehta 2024 gudnedoavttirduođaštusa
Gudnedoavttirnammadeame ákkastallamis boahtá ovdan ahte son lea earenoamážit áŋgiruššan nannet sámegiela ja sámi girjjálašvuođa, ja dáinna lágiin maid movttiidahttá sihke dutkiid ja girječálliid. Leat Ubmi universitehta Humanisttalaš fakultehta bargit geat su leat evttohan gudnedoavttirin.
- Lea hávski oažžut dovddastusa guhkes áigge bargguid ovddas. Lean duođaid nagodan bohtosiid čájehit, ledjen mielde ásaheamen sámi girjjálašvuođa universitehtafágan. Dan oktavuođas lea leamaš lunddolaš ohcat ja dutkat sullasašvuođaid eará álgoálbmogiid njálmmálaš ja čálalaš kultuvrrain, sihke teoriijaid ja metodaid dáfus ja maiddái fáttáid ja sisdoalu dáfus. Leamaš hui miellagiddevaš leat mielde ovddideamen ođđa fágasuorggi man gohčodit Critical Indigenous Studies, mii lea álgoálbmotdutkan sámegillii. Dát oahpposuorgi ja dutkan lea vuolggahuvvon min iežamet árvvuin ja vuođđuduvvon min iežamet eavttuide. Munnje leamaš hui dehálaš rasttidit šaŋŋer-rájáid iežan dutkamis, go sámi girjjálašvuohta lea viiddit go oarjemáilmmi meroštallan girjjálašvuođas. Danin lean mun barggustan váldán mielde sihke juoigama ja belohahkii maiddái govvadáidaga, go dat maiddái leat muitalusat láhkáseaset, ja dan dihtii gullet performative arts gaskii, dadjá Sámi allaskuvlla professor Harald Gaski, gii dál lea maiddái Ubme universitehta gudnedoavttir.
Gaski lea čehpet ovdánahttán ja čalmmustahttán sámi ja eamiálbmotgirjjálašvuođa sihke servodagas, alitoahpahusas ja dutkamis
Sámi allaskuvlla rektor Liv Inger Somby lohká dán stuora gudnin, go eará universitehtat oidnet dan mávssolaš barggu maid Sámi allaskuvlla seniordutki lea bargan ja bargá ain.
- Sámi allaskuvlla bealis de sávvat hui ollu lihkku min professorii Harald Gaskii. Son gal duođai ánssáša šaddat gudnedoavttirin, go lea áŋgiruššan ja ovdánahttán sámi ja eamiálbmotgirjjálašvuođa sihke dutkamis ja alitoahpahusas. Gaski lea maiddái erenoamáš čeahpes gaskkusteaddji, gii viššalit searvá kultuvra- ja servodatdáhpáhusaide sihke Sámis ja máilmmis, ja dainna lágiin čalmmustahttá iežas fágasuorggi viidát, dadjá rektor Liv Inger Somby.
Sámi allaskuvllas leat maid hui giitevaččat go Gaski lea nu viššalit čállán girjjiid ja lea viššalit máŋgalogi jagi sihke čállán, buvttadan ja goastadan fága- ja čáppagirjjálašvuođa šaŋŋeris girjjiid.
Gudnedoavttir Harald Gaski lea ožžon lastakránssa oaivái mii duođašta ahte son lea gudnedoavttir. Govven: Krister Stoor, Ubmi universitehta.
