Ohcciidlogut oahpaheaddjeoahpuide

Sámi allaskuvlla ohcciidlogut čájehit ahte Sámi vuođđoskuvlaoahpaheaddjeoahppu 5.-10. ceahki master (VUOMA 5-10) logut leat sullii nu mo leat leamaš diibmá ja ovddetjagi. Muhto 2022 ektui leat beali unnit ohccit bidjan dán oahpu vuosttašvuoruheapmin. Sámi vuođđoskuvlaoahpaheaddjeoahppu 1.-7. ceahki master (VUOMA 1-7) ohcciidlogut njidjet veahá dimmáža ektui, muhto sullii seamma oallugat leat bidjan dán oahpu vuosttašvuoruheapmin.

Fuomáš ahte dá leat ohcciidlogut, dat eai daja maide dan birra ahte gallis devdet sisabeassangáibádusaid ohppui. Dat logut almmuhuvvojit easka geasset, go fálaldagat almmuhuvvojit. Ohcciin lea maid vejolašvuohta rievdadit oahpuid vuoruheami gitta 1.7.24 rádjái, ja dat lea maid áigemearri buktit duođaštusaid sidjiide geat gárvejit oahpu dán giđa.