golggotmánu 21. beaivi 2020

61 ohcamuša sámi buohccidivššároahpu 25 sadjái

Oahppu álggahuvvo Sámi allaskuvllas ođđajagimánus 2021, ja lea ovttasbargu UiT- Norgga Árktalaš Universitehtain. 

- Lea illudahtti ahte badjel 60 ohcci leat válljen Sámi buohccidivššárohppui ohcat. Mii árvideimmet ahte dát oahppofálaldat boahtá geasuhit ollu ohcciid, go guhka lea leamaš sáhka das ahte mis duođai galggašii buohccidivššároahppu gos studeanttat besset sámegillii ja sámi kultuvrii čiekŋudit.  Mun sávan ahte mis leat ohccit miehtá Sámi go mii diehtit ahte lea nu stuora dárbu buohccidivššáriidda geat máhttet sámegiela ja geain lea sámi kulturgelbbolašvuohta. Dán oahppofálaldaga ásaheapmi lea ovdamearkan dasa mot guokte alit oahppoásahusa sáhttet ovttasbargat ja ovttasráđiid ásahit oahppofálaldaga mii lea stuora ávkin sihke sámi ja stuoraservvodagaide, ja mii ovddida ovttaárvosaš dearvvašvuođafálaldagaid sámi álbmoga váste, dadjá Sámi allaskuvlla rektor Laila Susanne Vars.

Doaibmi instituhttahoavda Dearvvašvuođa- ja ovddasmorašfágainstituhtas UiT:s, Linda Okstad, dadjá ahte lea illudahtti go badjel 60:s leat ohcan ohppui. Buohtastahttima dihte, de ledje 119 ohcci buohccidivššárohppui mii lea Álttás.

- Mii eat dieđe vel lea go buohkain obanassiige dat gelbbolašvuohta mii lea gáibádussan beassat ohppui, muhto sisaváldinbargu lea jođus ja dađistaga čuovun mielde barggu ovdáneami. Šaddá miellagiddevaš oaidnit man ollu ohccit leat main lea rievttes gelbbolašvuohta ja man ollugat álget ođđajagimánus, dadjá instituhttahoavda Linda Okstad.

UiT sisaváldinossodat lea dál ohcamušaid meannudeame, ja válljejit dasto oahpposajiid fállat ohcciide main lea buoremus gelbbolašvuohta dán ohppui.