Bilde portrett av Seija Risten Somby.
november 06. beaivi 2017

Vuosttaš virgáduvvon goahtejođiheaddji

Sámi allaskuvlla stivra lea mearridan Seija Risten Sombyii fállat jahkemearrevirggi Sámi oahpaheaddjeoahpuid ja álgoálbmotjournalistihka goađi jođiheaddjin 1.1.18 rájes 31.12.21 rádjái.

Lea vuosttaš geardde go Sámi allaskuvla virgáda goahtejođiheaddji. Ovdal leat goahtejođiheaddjit válljejuvvon. Dát čuovvu ge ođđa goahtestrukturproseassa man stivra lea mearridan.

Seija Risten Somby lea bargan Duoji- ja oahpaheaddjeoahpuid goađi goahtejođiheaddjin 2014 čavčča rájes. Dan ovdal son lea duojis allaskuvlalektorin leamaš. Son lea duojis fidnooahpaheaddjin ja sus lea fil. mag. gráda sámegielas ja sámi kultuvrras. Dasa lassin lea váldán gaskafágaoahpuid earret eará pedagogihkas. Son lea maid loahpaheame doavttergráda kulturantropologiijas.

Ođđajagimánu rájis Sámi allaskuvllas leat guokte goađi; 
Sámi oahpaheaddjeoahpuid ja álgoálbmotjournalistihka goahti man Seija Risten Somby jođiha ja 
Giela, duoji, boazodoalu ja servodatdiehtagiid goahti man Marit Meløy jođiha.