SÁM 241 Láidehus sámi báikenammadutkamii

Praktihkalaš dieđut

• Oahppokoda: SÁM 241
• 10 oahppočuoggá
• Oahpu lágideapmi: Oahppu lágiduvvo neahttadoarjjaoahpahussan: Eanaš logaldallamat leat neahta bokte, ja oahpus leat guokte geatnegahttojuvvon deaivvadanvahku Sámi allaskuvllas, Guovdageainnus.
• Oahppoplána
• Diibmoplána ja deaivvadanplána: TimeEdit 
• Jus leat jearaldagat mat gusket oahpposajeohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain, oahppohalddahus@samas.no 

Oahpu sisdoallu

Oahpus guorahallojuvvojit čuovvovaš nammafágalaš vuođđodieđut erenoamážit gielladieđalaš geahččanguovllus:

• sámi báikenammafága historjá ja dálá dilli;
• sámi báikenammafága sajádat sihke Davviriikkaid nammadutkanárbevierus ja eamiálbmogiid fágaárbevierus;
• báikenammadutkama gielladieđalaš vuođđometodihkka;
• nammafágalaš metodihka ja ráhkaduslaš analysa heiveheapmi erenoamážit sámi báikenammadutkamii;
• sámi guovlluid guovtte- ja máŋggagielat nammaráju lonenvuogit ja kontáktaonomastihka vuođđoprinsihpat;
• nammagáhtten ja sámi báikenamaid standardiseren.

Oahppoprográmma gullevašvuohta
Oahppu gullá sámegiela ja sámi girjjálašvuođa bachelorprográmma giellasuorggi válljenmuni oahpuide.

Oahpahusgiella
Oahpahusgiella lea davvisámegiella. Jus oassi logaldallamiin lea dáro- dahje ruoŧagillii, de dat dulkojuvvo dárbbu mielde. Eksámengiella lea davvisámegiella.

Oahpahan - ja oahppanvuogit
Logaldallamat, hárjehusat, studeanttaid čálalaš barggut ja geatnegahtton bargoseminára.

Eksámen
10-beaivásáš čálalaš ruovttubargu báikenammametodihkkii guoskevaš fáttás. Čállosa guhkkodat lea 10–13 siiddu. Árvvoštallan: Árvosátni A–F.