PED 602 Bagadallanpedagogihkka 1
- Oahpahusgiella: Davvisámegiella lea váldo oahpahusgiella ja eksámengiella Eará gielat sáhttet adnot guosselogaldallin ja dat dulkojuvvo davvisámegillii dárbbu mielde.
- Oahpu lágideapmi: Oahppu lea neahttavuđot oasseáiggeoahppu. Oahpus leat guokte neahttadeaivvadeami: oahpu álggus ja oahpu loahpas.
- 15 oahppočuoggá
Oahppoplána- Diibmoplána/deaivvadanplána: TimeEdit
- Jus leat jearaldagat mat gusket oahpposajeohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain, oahppohalddahus@samas.no
Oahppu addá formála gelbbolašvuođa bagadallat iežas suorggis, nugo vuođđoskuvlaoahpaheaddjeoahpu, mánáidgárdeoahpaheaddjeoahpu, praktihkalaš pedagogalaš oahpu, joatkkaskuvlla easka álgi oahpaheddjiid ja joatkkaskuvlla hárjehallama oahpaheaddjestudeanttaid ja eará oktavuođain nugo organisašuvdna- ja skuvlaovdánahttima oktavuođain.
Oahpu ulbmilin lea gieđahallat fáttáid dan birra mo bagadallat oahpaheaddjestudeanttaid, easka álgi oahpaheddjiid ja earáid geat dárbbašit bagadallama oahppoásahusain ja eará organisašuvnnain.
Bagadallanpedagogihkka guovddáš sisdoallu lea oahpásnuvvat iešguđet bagadallanvugiide ja fuomášit makkár bagadallanvuogit leat áigeguovdilat iešguđet dilálašvuođain. Dat mearkkaša ahte oahpus čađahuvvojit praktihkalaš barggut/hárjehallamat maid bokte studeanttat besset ovdánahttit iežaset teorehtalaš ipmárdusa sihke iežas ja earáid vásáhusaid vuođul. Oahppat fuomášit movt relevánta praktihkalaš dilálašvuođaid ja teorehtalaš suokkardemiid bokte sáhttá integreret dáid beliid nu ahte oahpahus- ja oahppanproseassat nannejuvvojit.
Oahppu huksejuvvo nu ahte studeanttat besset aktiivvalaččat searvat oahppandilálašvuođaide Sámi allaskuvllas, neahta bokte ja joavkobargguin, gos iešguđetlágan fáttát ja bagadallanteorehtalaš čuolmmat čadnojuvvojit oktii bagadallanmetodalaš gažaldagaid bokte.
Sisdoallu lea juhkkon guovtti váldofáddái:
Fáddá 1: Bagadallama vuođđu praktihkalaš ja teorehtalaš geahčasteamis sámi ja álgoálbmotperspektiivvas
- Bagadallama vuođđodoahpagat
- Bagadallama teoriijat ja metodat
- Gulahallan ja ovttasdoaibman
- Bagadallanságastallamiid sisdoallu ja čađaheapmi
- Etihkka, váldi ja kontrolla
- Sámi sisdoalut ja skuvllaid ja mánáidgárddiid servodatmandáhtta
Fáddá 2: Bagadallan hárjehallamis, sámi oahppoásahusain ja eará sámi organisašuvnnain
Maid mearkkaša leat hárjehallanoahpaheaddji ja kollega:
- Hárjehallanoahpaheaddji gáibádusat ja doaimmat ja dasa gullevaš dokumeanttat
- Kollegaid ja studeanttaid bagadallan
- Oahpaheaddjestudeanttaid profešuvdnamáhtu ja profešuvdnaidentitehta ovdánahttin
- Bagadallan ja árvvoštallan
- Didaktihkalaš analysa bagadallama vuođđodoaibman
- Mánáidgárddit ja skuvllat oahppoarenan.
