Davvisámegiela lohkanbadjeoahppu
- Oahpahusgiella: Davvisámegiella
- Oahpu lágideapmi: Fysalaš deaivvadeamit Sámi allaskuvllas, Guovdageainnus. Deaivvademiide ii leat vejolaš searvat neahta bokte.
- 30 oahppočuoggá
- Ollesáiggeoahppu
Oahppoplána- Lohkanmearri
- Diibmoplána/Deaivvadanplána: TimeEdit
- Jus leat jearaldagat mat gusket oahpposajeohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain, oahppohalddahus@samas.no
Háliidat go háhkat nu buori davvisámegielat máhtu ahte sáhtát álgit alit oahpu gazzat davvisámegillii? De dát oahppu heive dutnje!
Oahpu sisdoallu
Oahpu ulbmilin lea ahte studeanta háhká nu buori čálalaš ja njálmmálaš sámegiela máhtu, ja sámegiela teorehtalaš máhtu, ahte sáhttá oahpu maŋŋil álgit allaskuvlla- ja universitehtadási fágaoahpuide. Davvisámegiela lohkanbadjeoahpus don oahpásmuvat sámegiela giellaoahpa vuođđoáššiide. Teakstalohkama bokte don oahpásmuvat sámi čáppagirjjálašvuhtii ja áššeteavsttaide, ja don nannet iežat praktihkalaš ja teorehtalaš giellamáhtu. Geavatlaš giellageavaheapmi lea maid oassin oahpus. Go leat geargan oahpuin, de máhtát atnit sámegiela máŋggalágan diliin sihke njálmmálaččat ja čálalaččat, ja ipmirdat máŋggalágan njálmmálaš ja čálalaš teavsttaid.
Oahppoprográmma gullevašvuohta
Oahppu ii leat oassin Sámi allaskuvlla oahppoprográmmain. Oahpuin sáhttá duođaštit sámegiela gelbbolašvuođagáibádusa eanaš Sámi allaskuvlla vuođđooahpuide (geahča dárkilat dieđuid oahpuid sisabeassangáibádusain).
Oahpahan - ja oahppanvuogit
Logaldallamat, njálmmálaš ja čálalaš hárjehusat, joavkobarggut, geatnegahtton barggut.
Eksámen
Eksámenis leat guokte oasi: čálalaš ja njálmmálaš oassi. Guđa (6) diimmu čálalaš eksámenis iskojuvvojit kandidáhta čálalaš giellamáhttu, čálalaš giela ipmárdus ja máhttu lohkanmeari birra. Njálmmálaš eksámenis iskojuvvojit kandidáhta njálmmálaš giellamáhttu, njálmmálaš giela ipmárdus ja máhttu lohkanmeari birra. Njálmmálaš eksámen bistá sullii 30 minuhta. Čálalaš eksámen galgá leat dohkkehuvvon ovdal go studeanta beassá njálmmálaš eksámenii. Čálalaš eksámen deaddá ⅔ ja njálmmálaš eksámen ⅓ loahpalaš árvosánis.
Eksámenat árvvoštallojuvvojit ECTS-vuogádaga mielde, mas A lea buoremus árvosátni ja E lea vuolimus ceavzinárvosátni. F-árvosátni mearkkaša, ahte ii leat ceavzán.
