Sámi allaskuvla almmuha filosofiija doavttir Torkel Rasmussen girjji “Go ealáska, de lea váttis dápmat” duorastaga 11.12. 2014 diimmu 10:00. 

Girjjis guorahallá davvisámegiela ceavzinnávccaid Deanu ja Ohcejoga gielddas 2000-logu álggus.

- ­Vuosttažettiin lean ovddidan vuogi dahjege metoda mainna sáhttá guorahallat gielladili. Dán vuogi mielde sáhttá váldit čielgasa sámegiela dilis iešguđetge guovlluin ja evttohit mo buoridivččii dili, čilge Rasmussen. Su ođđa girji lea huksejuvvon diibmá almmuhuvvon nákkosgirjjis mas lea seammá namma.

Rasmussen lea gávnnahan ahte giellamolsun sámegielas dárogillii ja suomagillii lea meastá bisánan dutkanguovllus Deanu ja Ohcejoga gielddas. Giellamolsun lea maid muhtin muddui jorgalahttojuvvon go mánát máhttet sámástit vaikko váhnemat eai hála sámegiela eatnigiellan, ja muhtimin vaikko váhnemat eai máhte sámástit.
Stuorámus hástalus dutkanguovllus lea ahte mánát eai oahpa sámegiela skuvllas jos eai leat juo sámegielagat ovdalgo álget skuvlii. Rasmussen atná sivvan dasa ahte skuvllat geavahit láivves guovttegielat oahpahusmálle daid mánáid sámegiela oahpus.

Ohcejogas lea ges hástalus sámegiela ealáskahttimis ahte sámegielat mánát ja nuorat sámástit mealgat uhcibut gaskaneaset go Deanu gieldda mánát ja nuorat. Deanus mánát ja nuorat ohppet sámástit gaskaneaset sámegielat skuvllas. Ohcejogas mánát ja nuorat hárjánit suomastit gaskaneaset dannego suomagiella lea skuvllaid váldogiella.

Girjealmmuheapmi lágiduvvo 11.12. 2014 dii. 10.00. Sámi allaskuvlla Sáhkaskáiddis. Girjji olles namma lea “Go ealáska, de lea váttis dápmat. Davvisámegiela etnolingvisttalaš ceavzinnávccaid guorahallan guovtti gránnjágielddas Deanus ja Ohcejogas 2000-logu álggus. Dat  almmuhuvvo Dieđut-ráiddus mii lea Sámi allaskuvlla máŋggadieđálaš čálaráidu mas dutkanbohtosat leat almmuhuvvon 1974 rájes. Girjjis lea 342 siiddu ja dan sáhttá oastit Finnmark Kontorservice -nammasaš gávppis Guovdageainnus.

Oktavuođadieđut:

Torkel Rasmussen +47 78 44 84 71 dahje +358 40 41 870 40

Mattias Sikku Valio +47 78 44 84 96

Girjji čoahkkáigeassu