Sámi allaskuvla sávvá hui ollu lihkku Johan Mathis Turi WINU bálkkašumiin
- Lea stuorra illusáhka go mearriduvvui ahte World Indigenous Nations University, WINU bálkkašupmi geigejuvvui Johan Mathis Turii. Sus lea earenoamáš čehppodat mii lea leamaš ávkin Sámi allaskuvlii ja maiddái eará alitoahpo- ja dutkanásahusaide. Johán Máhtte lea leamaš min ásahusas sihke logadallin ja bagadallin, ja lea viššalit juogadan iežas gelbbolašvuođa nuoratgerddiin, dadjá rektor Liv Inger Somby.
WINU rámida dan mávssolaš ja guhkitáigge barggu maid Turi lea bargan go lea árvvus atnán álgoálbmogiid máhtu ja kulturárbbi. Son lea deattuhan boazoálbmogiid árbevirolaš máhtu dehálašvuođa boazobargguin. Son lea maid buorre oahpisteaddjin doaibman First Nations studeanttaide ja servodagaide Árktalaš universitehta bokte ja dan ovttasbarggu bokte mii lea Árktalaš EALÁT-instituhtain International Centre for Reindeer Husbandry ja máŋgga eará allaskuvllain miehtá Norgga.
- Johán Máhtes lea maid leamaš guovddáš doaibma máŋgalogi jagi Norgga boazosápmelaččaid riikkasearvvis ja Sámiráđis. Son dovdá hui bures boazodoalu viidát Sámis, maiddái ruošša-, suoma- ja ruoŧabeale. Son lea okta dán moaddásis gii dovdá buoremusat boazosápmelaččaid geat gullet sámi orohagaide, čearuide ja bálgosiidda, dadjá Somby.
Johan Mathis Turi lei maid mielde ásaheame riikkaidgaskasaš boazoálbmogiid organisašuvnna Association of World Reindeer Herders ja lei organisašuvnna vuosttaš presideanta.
- Ferten rábmot su áŋgirvuođa internationála dásis, go lea nagodan čohkket máilmmi boazoálbmogiid. Dát ovttasbargu álggii juo 1980-logus ja son lea okta dain gii lea viidát mannan guovlluin gos barget boazodoaluin. Son lea viššalit čohkken árbevirolaš dieđuid máŋgga guovllus, leaš dal Dukha álbmoga luhtte Mongolias, dahje Ruoššas Nenets, Evenki, Komi, Chukchi ja Khanty Mansisk guovllus, dadjá Somby.
Sámi allaskuvlla rektor lea bovden Johan Mathis Turi allaskuvlii dán čavčča ávvudit gudnebálkkašumi.
