desember 17. beaivi 2021

Dulkkaid autoriserenvuogádat

Ođđajagimánu 2022 fápmuibiddjo ođđa dulkaláhka, mas ee. daddjo ahte almmolaš ásahusat galget geavahit dohkkehuvvon dulkkaid. Norggas gávdno nationála registtar mas boahtá ovdan geat leat dohkkehuvvon dulkkat, ja das oaidná earret eará ahte leat dušše golbma stáhtaautoriserejuvvon dulkka davvisámegielas, ja ii oktage julev- ja lullisámegielas. Lea IMDI (Integrerings- og mangfoldsdirektoratet) mii hálddaša registara.

- Sámi allaskuvla lea čoahkkinastan IMDI:in čielggadan dihte heive go otná autoriserenvuogádat sámegielaide ja makkár rolla Sámi allaskuvllas sáhttá leat sámegielat dulkkaid autoriseren- ja guovttegielatvuođageahččaleami hárrái, muitala Giela-, duoji- ja servodatdiehtagiid goahtejođiheaddji Anne Britt Klemetsen Hætta.

OsloMet ja Sámi allaskuvla ovttasbarget sámi dulkaoahpu ásahemiin

Čoahkkimis lei maid sáhka sámi dulkaoahpu birra. Dál lea OsloMet mii fállá almmolaš dulka bacheloroahpu. OsloMet lea ovttas Sámi allaskuvllain guorahallame vejolašvuođa ásahit dulkaoahpu Sámi allaskuvlii.

- Dulkaohppui gullet maid dulkonehtalaš ja dulkonteknihkalaš fáttat. Lea ásahuvvon bargojoavku mii galgá buktit sin evttohusaid álggogeahčen 2022, dadjá Klemetsen Hætta.

Dárbu liige ruhtadeapmái

Ođđa dulkaláhka ja giellaláhka Norggas bohtet fápmui 01.01.22 rájes ja bidjet garra gáibádusaid dulkomii almmolaš ásahusain.

- Sámi allaskuvla lea Máhttodepartementii ovddidan dárbbu dákkár oahpu ásahit, ja dárbbašit liige ruhtadeami dasa, dadjá goahtejođiheaddji.