april 06. beaivi 2018
Lohkanguovddáža ođđa jođiheaddji
Sámi allaskuvlla stivra mearridii fállat Berit Anne Bals Baalii virggi Sámi lohkanguovddáža jođiheaddjin ja son lea dohkkehan fálaldaga ja álgá jođiheaddjin Sámi lohkanguovddážii.
Son bargá dál Romssa universitehta lektoriin sámegielas, ja lea doppe maŋemus nuppelot jagi bargan sihke dutkin ja logaldallin. Bals Baal lea barggu olis čájehan earenoamáš beroštumi mánáid sámegieloahpaheamis.
- Mii leat hirbmat movttegat go Biret Ánnii álgá dán virgái. Sus lea hui nanu fágalaš duogáš mii lea hui dehálaš dál go lohkanguovddáš lea šaddan nationála gealboguovddážin. Mii sávvat sutnje bures boahtin, rektor Gunvor Guttorm cealká.
Sámi lohkanguovddáš. Máhtte Sikku Valio lea govven.
