Sámi allaskuvla áigu ásahit doavttergrádaprográmma (PhD)
Sámi allaskuvla lea hábmen ođđa oahppopográmma. Dát lea Sámegiela ja sámi girjjálašvuođa doavttergrádaprográmma (PhD), mii lea máilmmi vuosttaš dutkioahpu prográmma mii čađahuvvo sámegillii.
Sámi allaskuvla lea ohcamin akrediterema álggahit PhD-prográmma. NOKUT (Norges organ for kvalitet i utdanninga/ Norwegian Agency for Quality Assurance in Education, http://www.nokut.no) galgá guorahallat ohcama. NOKUT lea juo dohkkehan Sámi allaskuvlla ohcama hálddahuslaččat ja nammadan fágalávdegoddi. Lávdegotti bargu lea árvvoštallat PhD-prográmma sisdoalu ja ráhkadusa.
Sámegiela ja sámi girjjálašvuođa doavttirgráda oahppu fátmmasta gielladutkama, sosiolingvistihka, báikenammadutkama ja eamiálbmotgirjjálašvuođa dutkama. Sámegiella lea váldo oahpahus- ja dutkangiellan. Vuosttažettiin dat lea davvisámegiella. Doavttergrádaprográmmas sámegiella lea sihke fágasuorgi ja dutkanoahpu giella. Dat ovttastahttin addá doavttirgrádahasaide čiekŋalis máhtu sámegiela ja sámi girjjálašvuođa surggiin, nanne ja ovddida sámegiela dieđagiellan.
NOKUT lávdegoddi gálleda allaskuvlla miessemánu 14.-15.beivviid . Lávdegotti miellahtut leat:
- Professor emerita Ingeborg Kongslien, Institutt for lingvistiske og nordiske studier/Department of Linguistics and Scandinavian Studies, Oslo universitehta
- Professor (Commonwealth and Postcolonial Literatures) Graham Huggan, University of Leeds, Stuorrabritánia (Great Britain)
- Professor (finsk lingvistikk/Finnish linguistics) Anna-Riitta Lindgren, Tromssa universitehta
- Stipendiáhtta (Kanada inupiaq-giela dutkan) Signe Rix Berthelin, NTNU (Norges teknisk-naturvitenskapelige universitet/Norwegian University of Science and Technology)
PhD-oahpu namma dárogillii: Doktorgradsprogram i samisk språk og samisk litteratur
PhD-oahpu namma eŋgelasgillii: PhD Program in Sámi Language and Sámi Literature
Eambbo dieđut:
Mai Britt Utsi, Gielladieđagoađi jođiheaddji, Mai-Britt.Utsi@samiskhs.no
Jelena Porsanger, rektor - (+47) 92262212
