Professor Emeritus 70 jagi
Dr. Ole Henrik Magga lea Sámi allaskuvlla Professor Emeritus ja deavdá ihttin 70 jagi.
Magga lea riegádan borgemánu 12. beaivvi 1947 ja lea guhkit áiggi bargan sámi ja álgoálbmotáššiid dutkamiin, vuoigatvuođaiguin ja politihkain, ja sus leat leamaš olu politihkalaš ja dutkamii guoski virggit sihke ruovtturiikkas ja riikkaidgaskasaččat.
- Ole Heandarat lea iežas sámegiela ja servodat- ja eamiálbmotberoštumiiguin leamaš doarjjan ja ovdagovvan midjiide earáide. Son lea dakkár olmmoš gii sáhttá ja máhttá buot lágan olbmuiguin gulahallat, ja guldala ja rávve. Mun lean álo iešge dovdan buorre doarjaga Ole Heandaragas, dadjá Sámi allaskuvlla rektor Gunvor Guttorm.
Mánnávuođa rájes lohká iežas juo fuomášan ahte sámiin lea vuolit sadji servvodagas go earáin. Nuorran go diđolaččat válljii čájehit sámevuođa de beasai gullat mo sihke stuorra servvodagas ja sápmelaččat ieža vigge sihke cielahit ja caggat sámi álbmoga. Sutnje šattai danne hui čielggas ahte lei riekta álgit áŋgiruššat sámi áššiid ovddas ja searvat sámi politihkkii.
Ole Henrik Magga álggii nuorran juo bargat sámiid áššiiguin. Son lea bajásšaddán Ávževuomis Guovdageainnus. Vázzán vuođđoskuvlla Guovdageainnus ja Kárášjogas, gymnása Askeris ja lohkan reálafágaid ja sámegiela Oslo universitehtas. Son válddii magistargráda 1976:s ja doavttirgráda 1986:s. Son oahpahii sámegiela Álttá oahpaheaddjiallaskuvllas 1975–77. 1977-87 barggai Sámi Instituhtas. 1987:s šattai Oslo universitehta professor, ja 1990 rájes sus lea leamaš virgi dáppe Sámi allaskuvllas. Allaskuvllas son lea maiddái jođihan dutkanprográmma Ealát, boazodoalu ja dálkkádatrievdadusaid birra. Magga lea leamaš Norgga Sámiid Riikkasearvvi jođiheaddji 1980-85, Sámedikki presideanta 1989-97, Máilmmi Kultuvra- ja Ovdáneapmekommišuvnna lahttu 1993–95, ON Eamiálbmotáššiid Bissovaš Foruma ovdaolmmoš 2002–2004 ja Norgga dutkanráđi váldostivralahttu ja Finnmárkokommišuvnna láhttu.
Son lea fargga 50 jagi aktiivvalaččat searvan luohttevaš doaimmaide politihkas, sihke sámeservviid ásahemiin, riikasearvvi jođiheaddjin, Sámedikki presideantan.
Sámi allaskuvllas bohte olu váimmolaš lihkkosávaldaga.
