Verddeovttasbargu gaskkal Sámi allaskuvlla ja Guovdageainnu suohkana
Sámi allaskuvla lea čállán viđa jagi verddešiehtadusa Guovdageainnu skuvllain ja Beazedievá mánáidgárddiin Guovdageainnu suohkanis. Verddeovttasbarggu ulbmil lea máhttojuogadeami bokte nannet kvalitehta mánáidgárddis, vuođđoskuvllas ja Sámi allaskuvlla oahpaheaddjeoahpuin. Mihttun lea ahte ásahusat ovdánit buot dásiin buorrin sámi servodahkii. Duogáš verddeovttasbargguide lea ráđđehusa nationála strategiija loktet kvalitehta oahpposuorggis “Lærerutdanning 2025”.
Ovttadássásašvuohta ja juogadeapmi
Kvalitehtaovdánahttima ovttasbarggu guovddáš doaimmat čatnasit hárjehallanohppui, máhttojuogadeapmái ja dutkan- ja ovdánahttindoaimmaide. Báikkálaš máhttodárbbut ja hástalusat leat vuolggasadjin ovttasbargui ja ovttasbargu galgá ávkin goappašat beliide. Verddeovttasbarggus deattuhuvvo ovttadássásašvuohta, goabbat ge beali earenoamáš gelbbolašvuođat ja goappašat beliid ovdánahttindárbbut.
Ovttasbarggus lea sáhka juogadit dieđuid ja gelbbolašvuođa, nu go ođđaseamos dutkanbohtosiid. Ságastallat hástalusaid ja ovdánahttindárbbuid birra ja gulahallat dutkanfáttáid birra. Hárjehallanoahpahusa ektui lea áigumuš ásahit váldo hárjehallanbáikkiid, gos lea nanu fágabiras mii addá hárjehallanoahpaheddjiide ja studeanttaide buriid eavttuid čađahit oahpu.
Searvebargu
Sámi allaskuvlla oahpaheaddjeoahpuid goahtejođiheaddji, John-Marcus Kuhmunen lea ilus verddešiehtadusaiguin.
Sámi allaskuvllas lea álggu rájes juo leamaš dehálaš ovttasbargu verddesuohkana skuvllaiguin ja mánáidgárddiiguin hárjehallanoahpahusa ektui. Dál go lea viidát ovttasbargu, de jáhkán mii searválaga nagodit ovdánahttet, áigeguovdilastet ja nannet kvalitehta sámi mánáidgárdde-, skuvla- ja oahpaheaddjeoahppobargguin, dadjá goahtejođiheaddji John-Marcus Kuhmunen.
Sámi árbevirolaš máhttu, sámi kultuvra ja sámegiella leat guovddážis Guovdageainnu suohkana skuvllas ja mánáidgárddis ja Sámi allaskuvllas. Dát leat vuođđun go ovttasbargoguoimmit jotket ráhkadit doaibmaplánaid ja gávnnahit bargovugiid.
Eanet dieđuid ášši birra sáhttá oažžut áššemeannudeaddjis Karen Lovise Siri Stångberg.
