Stádabušeahtta: Nanne sámi alitoahpahusa
Sámi allaskuvla oažžu dál 7 miljovnna ruvnno lasiheami dan ektui mii ráđđehusa bealis lei evttohuvvon. Ráđđehus lea ovdalaččas evttohan 3,3 mill ruvnnu Sámi allaskuvlii, ja Sosialisttalaš gurutbellodat bijai gáibádusa lasihit Sámi allaskuvlii ruhtadeami vai allaskuvla sáhttá bisuhit dálá oahppofálaldagaid ja álggahit ođđa oahpuid nu go omd. dulkaoahpu.
- Lea álo buorre go nagoda bures gulahallat nationála politihkalaš bellodagaiguin Stuorradikkis, ja ahte sii oidnet sámi servodaga dárbbuid. Mis lea leamaš hui buorre ovttasbargu Sámedikkiin ja sámediggeráđiin dán áššis. Lea oadjebassan buohkaide go diehtit, ahte eat galgga heaittihit oahpuid, muhto baicce geavahit áiggi ovddosguvlui ovdánahttit ođđa oahppofálaldagaid, dadjá Sámi allaskuvlla stivrajođiheaddji ja rektor Liv Inger Somby.
Vejolaš álggahit dulkaoahpu
Sihke sámi servodagas ja muđui servodagas váilot dulkkat. 2022:s bođii dulkaláhka mii geatnegahttá almmolaš ásahusaid atnit dohkkehuvvon dulkkaid dakkár oktavuođain go dulkka bokte šaddá gulahallat, omd. buohcciviesus dahje diggegottis. Sámi allaskuvla lea dál bargame ovttas Oslo Met:in čađahit guovttegielatiskkadeami sidjiide geat háliidivčče dulkan bargagoahtit dahje geat barget juo dulkan, muhto váilu oahppu dasa.
- Mii dán vahkku plánegoahtit dulkaoahpu ja áramusat sáhttit fállagoahtit oahpu maŋit jagi, ovdal dan eat geargga. Fertet vuos oahppoplánaid ráhkadit ja seammás maid sihkkarastit buori ja vuđolaš rekrutterema, sihke bargiid ja studeanttaid, čilge Liv Inger Somby.
Sámegiela álgolohkankursa mearrasámi guvlui
Sámi allaskuvlii addui árabut čakčat liigeruhtadeapmi mii lei juo ovdagihtii mearriduvvon ahte galgá mannat álggahit sámegiela álgolohkankurssa Nuorta-Finnmárkkus. Dat kursa álgá boahtte čavčča Girkonjárggas. Muđui čađaha juo Sámi allaskuvla sámegiella ja girjjálašvuođa oahpuid álgodásis gitta doavttergrádadássái.
- Sámi allaskuvllas lea servodatovddasvástádus nannet gelbbolašvuođa, buot dásiin. Go dál fállat giellagurssa Nuorta-Finnmárkkus, Girkonjárggas, de han mii sirdit oahppofálaldaga dan guvlui gos lea duođaid dárbu sámegiel` oahpuide. Mii maid fertet buorebut gulahallagoahtit Sámi giellaguovddážiiguin, go máŋgga guovllus leat buriid ovdánahttindoaimmaid álggahan giellaoahpus. Mu mielas lea riekta ahte mii maid vuoruhat mearrasápmelaččaid, gulahallat singuin oahpuid ektui. Mii leat maiddái plánegoahtán mo boahtteáiggis sáhtašeimmet nannet ja fállagoahtit oahpu nuortalašgielas, muitala Sámi allaskuvlla rektor.
