Sámi allaskuvla fállagoahtá oahpu sámi oahpaheddjiide Ruoŧas

Ruoŧa Skolverket lea diŋgon Sámi allaskuvllas joatkkaoahpu Ruoŧa sámi oahpaheddjiide, geat barget sámi skuvllas dahje oahpahit sámegiela.

Oahpu ulbmilin lea nannet ja čiekŋudit oahpaheaddji gelbbolašvuođa sámegielas, mii addá vejolašvuođa háhkat legitimašuvnna sámegiela eatnigiela oahpaheaddjin. Dakkár legitimašuvdna dárbbašuvvo juohke oahpus Ruoŧas.

Oahput sámi servodagaid dárbbuid ja ávkki vuođul
Sámi allaskuvlla strategiijaplánas 2017-2021 mihttomearrin lea ee. hukset fálaldagaid, mat dustejit sámi servodagaid fágalaš hástalusaid. Strategalaš vuoruheapmin lea atnit lagaš gulahallama ja ovttasbarggu sámi servodagaiguin ja leat njunnošis fállamin oahppofálaldagaid sámi servodagaid dárbbuid ja ávkki vuođul.

– Mii leat hui ilus go leat olahan šiehtadusa, ja nu sáhttit nannosabbot leat ovttasráđiid bargamin Ruoŧa sámeoahpahusa buorrin. Oahpaheaddjeoahpuid fágabiras ja 1. amanueanssa Ylva Jannok Nutti leat áŋgiruššan fágalaš sisdoaluiguin, dadjá Sámi Allaskuvlla rektor Gunvor Guttorm.

Sámi allaskuvlla masterplánat vuođđun
Sámi allaskuvla fállá vihta 7,5 oahppočuoggá kurssa 2,5 jagi áigge. Oahput lea hábmejuvvon Skolverket diŋgojumi mielde, ja daid vuođđun leat Sámi allaskuvlla sámi oahpaheaddjeoahpuid masterplánat.

Deaivvadeamit Johkamohkis ja neahta bokte
Oahput lágiduvvot deaivvademiid ja neahta bokte. Deaivvadeamit leat Johkamohkis, gosa oahpaheaddjit čoahkkanit. Sámi allaskuvla galgá geavahit Lappland’s lärocenter luohkkálanjaid ja infrastruktuvrra.

Skolverket Ruoŧas
Oahpahusšiehtadus lea gaskkal Sámi allaskuvlla ja Ruoŧa Skolverketa. Skolverket Ruoŧas vástida Norgga Oahpahusdirektoráhta ja Suoma Oahpahusráđi mat leat departemeanttaid/ministeriijaid vuollásaš orgánat.

Eambbo aššis Skolverket siiddus (ruoŧagillii):

Bli behörig lärare i samiska