June 15. beaivi 2021

Loahpahandoalut/ Graduation ceremony

Sámi allaskuvla lágida 2020-2021 oahppojagi loahpahandoaluid Diehtosiiddas gaskavahkku geassemánu 16. beaivvi, diibmu 12:00 - 14:00. Mii ávvudit ja juohkit diplomaid kandidáhtaide geat leat gárven oahpu dán oahppojagi.

Korona njuolggadusaid dihte sáhttit dušše bovdejuvvon gussiid luoitit doaluide, muhto ávvudoalut bohtet streamejuvvot vai maiddái earát besset leat mielde ávvudeamis. Čuovo ávvudoaluid streama bokte.

Prográmma:

Guoimmuheapmi

Oahppohoavda Áila Márge Varsi Balto sávvá bures boahtima

Rektor Láilá Susanne Vars rahpansárdni

Dearvuođat ja diplomajuohkin kandidáhtaide

Snoahpamuš, gáffe ja gáhkku Diehtosiidda kantiinnas

Guoimmuheapmi - Ivnniiguin

Oktasaš govven

Guommuheapmi - Ivnniiguin
Sámi vuosttaš rockejoavku Ivnniiguin lea leamaš dehálaš hábmemis stuora oasi sámi musihkkahistorjjás. Ivnniiguin joavku álggahuvvui áiggis go dáruiduhttin garrasit váikkuhii sámi kultuvrra ja giela, ja lea leamaš dehálaš davvisámegiela, identitehta ja luođi nannemis Guovdageainnus ja vel viidát Sámis.

Guovdageainnu ásahusat Sámi beassášmárkanat ja Beaivváš Sámi Nášunálateáhter ávvudit 50- ja 40-jagi jagis 2021. Ivnniiguin vuosttaš konsearta lei jagis 1978, Plasthállas Sámi beassášmárkaniin, ja leat ge okta dain joavkkuin maid geahččit juohke jagi sávvet čuojahit beassážiid. Ivnniiguin joavku lea leamaš guovddážis hábmemis musihka Beaivvážii álgojagiid. Joavku komponerii earret eará musihka “Min duoddarat” bihttái, mii lei vuosttaš teáhterbihttá maid Beaivváš Sámi Nášunálateáhter ovdanbuvttii. Beaivváš ávvuda ge 40-jagi beaivvi geassemánu 12.06.21.

Joavkkus leat:

Áilloš/Iŋgor Ántte Áilo Gaup
Heaika Hætta
Roger Ludvigsen
Nils Martin Kristensen
Sverre Hjelleset
Ville Söderbaum (guosseartista)