BA - Jahkebealovttadat

Gelbbolašvuođalokten mánáidgárddiin-Čiekŋudeapmi árbevirolaš máhtus ja sámi kultuvrras

  • Oahpahusgiella: Oahpahusgiella lea davvisámegiella. Soames logaldallamat sáhttet leat eará sámegielaide, dahje skandinávagillii. 
  • Oahppokoda: PED 182
  • Oahpahusbáiki: Sámi allaskuvllas deaivvademiid ja neahta bokte
  • Fállojuvvo gelbbolašvuođalokten kursan mánáidgárdeoahpaheddjiide ja mánáidgárdebargiide.
  • 30 oahppočuoggá
  • Deaivvadanplána: TimeEdit

Oahppu fátmmasta sámi mánáidgárdebargi ámmáha dieđu ja hutkás ovdánahttinmáhtu. Oahppofálaldat addá studeanttaide vejolašvuođa čiekŋudit árbevirolaš ja dálá kultuvrralaš doaimmaide. Oahpus deattuhuvvojit kultuvrralaš ja sosiála bistevašvuohta, luondu ja olbmo birgen.

Guovddážis leat máŋggakultuvrralaš perspektiivvat. Oahpus prošeaktabargu lea stuorra oassi ja studeanttat galget guorahallet pedagogalaš perspektiivva vuođul sin válljenfáttá árbevirolaš máhtu siskkobealde, masa sis alddis lea beroštupmi. 

Fága čađahuvvo ovtta lohkanbajis. Geabbilisoahppan, namalassii neahttadoarjja oahppan lea fágavuođđun čađaheamis. 

Sisabeassangáibádusat

Dábálaš sisabeassangáibádusat alitoahpahussii ja sámegielmáhttu. Sisabeassanvuođđu sáhttá leat juogo oppalaš lohkangelbbolašvuohta (čađahan joatkkaskuvlla/logahaga) dahje reálagelbbolašvuohta.

Dasa lassin gáibiduvvo ahte ahte ohcci lea juogo čađahan dahje čađaheame mánáidgárdeoahpaheaddjeoahpu dahje vástideaddjioahpu, dahje ahte ohcci bargá mánáidgárddis.

Sámegiela gáibádusa sáhttá deavdit čuovvovaš vugiid mielde: Norgga joatkkaskuvllas sámegiella 1. dahje 2. giellan 2, Suoma logahagas eatnigielladutkkus dahje lohkan sámegiela vierrogiellan ja Ruoŧa gymnásas eatnigiellan (modersmål 200 čuoggá) dahje ođđaáigásaš giellan (moderna språk 200-300 čuoggá) dahje vástideaddji sámegieloahppu doaibmi njuolggadusaid mielde. Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit giellageahččaleami maid Sámi allaskuvla lágida. Jus lea eahpesihkarvuohta man dási gelbbolašvuohta ohccis lea, de ášši ovddiduvvo fágalaš árvvoštallamii ja meannuduvvo dán vuođul.