Ovdal go oahppu álgá

Vuolgge olgoriikii lonohallamii Govven: Kenneth Hætta

Maid sáhtát čoavdit ovdal oahpu álgima?

Muhtun áššiid lea buorre čoavdit ovdal go oahppu álgá. Oahpu álgima oktavuođas lea dávjá ollu mii dáhpáhuvvá, ja ollu áigi sáhttá sestojuvvot jus muhtun áššit leat čovdojuvvon ovdal oahpu álgima.

Lohkanbadjedivada máksin
Buohkat fertejit leat máksán lohkanbadjedivada ovdal go besset registreret studeantan ja ožžot studeantavuoigatvuođaid. Giro gávnnat StudentWebas, dat ii sáddejuvvo boastta dahje e-boastta mielde. 
 
Don logget sisa StudentWebai seamma geavaheddjiin ja beassansániin go mainna ohcet ohppui Søknadswebas. Sáhtát nai diŋgot beassansáni ođđasit nu ahte dat sáddejuvvo dan e-boastačujuhussii maid registrerejit go ohcet ohppui.  Fuomaš: Studeanttaide geain ii leat Norggá personnummár fertejit váldit oktavuođa oahppohálddáhusain oažžundihte sin fiktiiva Norgga riegadannummára (geavaheaddjinamma) ja beassasáni. 
 
Buot studeantat mákset lohkanbadjedivada Sis-Finnmárkku Studeanta Ovttastussii ja ávnnasdivada Sámi allaskuvlii. Oasseáiggistudeantat mákset oktiibuot 550 ruvnno ja ollesáiggistudeantat mákset oktiibuot 700 ruvnno. Máksináigemearri čakčalohkanbajis lea 01.09 ja 01.02 giđđalohkanbajis.


Studeantaregistreren
Go leat máksán lohkanbadjedivada ja máksu lea boahtán midjiide, de beasat registreret iežat studeantan. Dan dagat studentweb bokte.  Fuomáš ahte sáhttá ádjánit moadde beaivvi ovdal mii oažžut máksindieđu báŋkkus ja ovdal dasto beasat registreret. 
 
Go leat registrere iežat studeanttan, de sáhtát easka ráhkadit IT-konto, oažžut studeantaduođaštusa, čoavddagoartta, ja stipeandda ja loana Lånekassas. 
 

IT-konto
IT-konto ráhkademiin ráhkadahtát alccat FEIDE-geavaheaddji, mii adno go logget sisa studentaduođaštus-appai ja eduroama (internehttii) . IT-konto ráhkadat dáppe.

Canvas
Geavaheaddjinamma ja beassansáni oaččut e-boastta bokte. Jus it leat ožžon, váldde oktavuođa iežat koordináhtoriin. 

 

Studentbevis-app
Don sáhtát viežžat studeantaduođaštus-appa iežat mátketelefuvdnii (Studentbevis-app). Dan sáhtát atnigoahtit maŋŋel go leat máksán studeantadivvága ja registrerehan iežat studeantan. Appa sáhttá adnot jus dárbbahat duođaštit studeantavuoigatvuođaid vai omd. oaččut hálbbit gálvvuid, bileahtaid jna. Čoavddakoartta oažžumii dárbbahuvvo nai studentbevis-appa.

Čoavddakoarta
Go leat máksá lohkanbadjedivvága ja máksu lea registrerejuvvon, de sáhtát oažžut čoavddakoartta. Mávssu duođaštat studentbevis-appain.

Ođđa studeanttaide ráhkaduvvo čoavddakoarta Sámi allaskuvlla ovdakantuvrras, Diehtosiidda boađáhagas. Jus it sáhte boahtit Sámi allaskuvlii ráhkadahttit koartta, de sáhtát diŋgot koartta oahppohálddahusas (oahppohalddahus@samiskhs.no). De sáddet nama ja gova namuhuvvon e-boastačujuhussii.

Čoavddakoarttain beasat Diehtosiidii ja dat doaibmá luoikkahankoartan Sámi allaskuvlla girjerádjosis.

Loatna ja stipeanda
Loatnakássas leat rutiinnat stipeanda- ja loatnamáksimiidda. Loatna ja stipeanda máksojuvvo go leat máksán lohkanbadjedivada ja registrerejuvvon studeantan. Sámi allaskuvllas manná automáhtalaččat diehtu loatnakássii go don leat dahkan buot maid galggat.


Eambbo dieđuid ja ohcanskovi gávnnat Loatnakássa ruovttusiiddus.

Sisaheiveheapmi
Jus don leat ovdal čađahan oahpu maid doaivvut heivet oassin ohppui maid áiggut čađahit Sámi allaskuvllas, de lea dus vejolašvuohta ohcat ovdal čađahuvvon oahpuid sisaheivehuvvot ohppui maid áiggut čađahit Sámi allaskuvllas. Jus leat ovdal čađahan oahpuid mat sulastahttet geatnegáhtton osiid oahpus maid čađahat Sámi allaskuvllas, de lea vejolaš ohcat beassat eret dáin osiin oahpus. Lea maid vejolaš ohcat ovdal čađahuvvon oahpuid sisaheivehuvvot doarjjafágan. Dus lea maid vejolašvuohta ohcat beassat osiin oahpus reálagelbbolašvuođa vuođul.

Sisaheivehemiid birra sáhtát lohkat eambbo dáppe.

Politiijaduođaštus
Forskrift om opptak til høyere utdanning, kapihttal 6, vuođul gáibiduvvo politiijaduođaštus oahpuin gos studeanttat leat oktavuođas mánáidgárdemánáiguin ja ohppiiguin dahje earáiguin oassin hárjehallamis. Sámi allaskuvllas dát gusto čuovvovaš oahpuide: Mánáidgárdeoahpaheaddjeoahppu, Sámi vuođđoskuvlaoahpaheaddjeoahppu 1.-7., Sámi vuođđoskuvlaoahpaheaddjeoahppu 5.-10. ja praktihkalaš pedagogalaš oahppu.
Politiijaduođaštusa sisabuktima áigemearit:

  • Ohccit geat ožžot fálaldaga namuhuvvon oahpuide, ja geain lea mearkkašupmi politiijaduođaštusas mii lea relevánta guoskevaš oahpu sisaváldimii, galget sáddet politiijaduođaštusa oahppoásahussii golmma (3) vahkkus.

  • Ohccit geat ožžot fálaldaga namuhuvvon oahpuide, ja geain ii leat mearkkašupmi politiijaduođaštusas mii lea relevánta guoskevaš oahpu sisaváldimii, galget buktit politiijaduođaštusa oahppoásahussii maŋemusat oahpu álgimii.

  • Ohccit geat ožžot fálaldaga namuhuvvon oahpuide unnánat go njealljenuppelohkái (14) beaivvi ovdal oahpu álgimi, vejolaččat maŋŋel oahpu álgima, galget buktit politiijaduođaštusa maŋemusat golbma (3) vahkku maŋŋel go oahpposajifálaldat lea addon. 

Politiijaduođaštus ii galgga leat boarrásit go golbma (3) mánu.