Oahpaheaddjeoahput: Rektor Laila Susanne Vars

Sámi allaskuvla lea áidna allaskuvla mii fállá oahpaheaddjeoahpu mas lea sámi pedagogihka vuođđun. Oahpaheaddjeohppui leat ásahuvvon buorit stipeandaortnegat, lea sihkkaris bargu maŋŋel oahpu ja oahpaheaddjebarggus leat ollu vejolašvuođat hábmet iežat vuogi dihto rámmaid siskkobealde.

Muhto manne galggašit Sámi allaskuvlla oahpaheaddjeoahpu váldit? Dás vuolábealde čilge allaskuvlla rektor min ovdamuniid.

Dihtet go don ahte sáhtát orrut iežat ruovttus ja goitge váldit vihtta jagi masteroahpu?

Sámi allaskuvlla oahpaheaddjeoahput lágiduvvojit neahttaoahpahussan. Visot logaldallamat čađahuvvojit neahtas, ja báddejuvvojit vel.

- Nu ahte jus ii leat šaddan searvat dalle go lei logaldallan njuolggosáttan, de sáhtát maŋŋil geahččat, čilge Sámi allaskuvlla rektor Laila Susanne Vars.

Hárjehallamiid sáhtát čađahit miehtá Sámi, sihke Ruoŧas, Suomas ja Norggas. Maiddái gávpogiin ja gilážiin lea vejolaš čađahit bargohárjehallamiid.

Movt de lea studeantaeallin go neahta bokte lea oahpahus?

Deaivvadeamit leat sullii oktii mánus, olles oahppojagi. Juohke deaivvadeapmi lea 5 beaivvi – mánnodagas bearjadahkii. Dalle lea áigi oahpásnuvvat eará studeanttaiguin ja oahpaheddjiiguin. Diehtosiiddas lea hárjehallanlatnja ja Studeantastivra sáhttá lágidit feara máid eahkediid Diehtosiidda lanjain. Diehtosiida lea viesu namma gos Sámi allaskuvla lea.

- Háliidan maid fuomášuhttit ahte Sámi allaskuvllas lea sámegiella oahpahusgiella, bargogiella ja dutkangiella. Lea buorre vejolašvuohta ovdánahttit sámegiela gelbbolašvuođa go válddát oahpu Sámi allaskuvllas, muitala Laila Susanne.

Gos sáhtát orrut dalle go leat deaivvadeamit?

Sámi Studeanttaid Ovttastus (SSO) láigoha studeanttaide orrunbáikki deaivvademiid oktavuođas. Don sáhtát dušše daid beivviid/vahkuid láigohit lanja go leat Guovdageainnus.

SSO doaimmaha maiddái kantiina Diehtosiiddas. Kantiinas lea liegga biebmu juohke beaivvi, ja studeanttaide lea hálbbit doppe boradit go earáide.

- Leat hui njuovžilis ortnegat maid SSO fállá studeanttaide, fuomášuhttá Vars.

Movt jus leat mánnaolmmoš?

Váldde máná mielde Guovdageidnui dalle go leat deaivvadeamit. SSO:s lea studeantamánáidgárdi gos sáhtát oažžut mánáidgárdesaji dalle go leat deaivvadeamit, ja mávssát dušše daid beivviid ovddas go mánná lea mánáidgárddis.

- Mánáidgárddis lea sámegiella váldogiella. Jus ii leat sámegiella nu nanus, de lea buorre vejolašvuohta oahppat eambbo. Mánáidgárdi lea hárjánan heivehit buohkaide iešguđet gielladásiide iežaset doaimmaid, čilge rektor.

Movt loaktit áiggi Guovdageainnus?

Guovdageaidnu lea sámi gilli, gos márkanbáikkis orrot sullli 1500 olbmo. Sámegiella lea beaivválaš giella juohke báikkis, nu go ruovttuin, rámbuvrrain, almmolaš kantuvrrain, dearvvašvuođasuorggis jna. Astoáiggis leat ollu vejolašvuođat searvat vaikko masa.

- Dáppe lea ealli sámi dáiddabiras, musihkkabiras, duodjebiras ja valáštallanbiras. Maiddái meahcástallan lea juoga máid lea álki čađahit dáppe, go leat viiddis duoddarat ja ollu jávrrit dakka das olggobealde viessonurkki, loahpaha rektor Laila Susanne Vars.