Studeanttaide

(Ođastuvvon borgemánu 24.beaivvi)

Sámi allaskuvla lea geassemánu 15. beaivvi rájes rabas fas. 

Fuomáš! Lágidemiin gos olbmot čoahkkanit, leat sierra doaibmabijut máid buohkat fertejit čuovvut vai eastadit dávddaid njoammuma. 

Riskavuloš studeanttat: Studeanttaide main lea alit riska duođalaččat buohccát jus covid-19 dávda njoammu, berre árvvoštallat heivehit skuvlabargguid/oahpu. Ferte leat doavtterduođaštus dakkár heiveheami oažžut.

Deháleamos njoammuneastandoaimmat máid buohkat galget čuovvut, leat:

1. Buohcan ja erren

  • Jus leat buohcci dahje illáveaje, de galggat orrut ruovttus.
  • Jus leat erremis, de it galgga boahtit Diehtosiidii.

2. Ráinnasvuohta

  • Basa gieđaid dávjá ja dárkilit loika sáibočázis. Jus ii leat čáhci, geavat giehtasprihta.
  • Gastit ja gossat galgá njunnebáhpira sisa máid bálkestat, dahje jus ii leat bábir, de giehtagávvii.
  • Basa gieđaid ovdal go guoskkahat ámadaju ja ovdal go boradat.

3. Doalat gaskka eará olbmuide

  • Doalat unnimusat mehtera gaskka nuppi olbmui juohke sajis.

4. Mátkkošteapmi

Buohkat geat bohtet Norgii dakkár guovllus máid Norgga ráđđehus lea merken ruoksadin ja ránisin kárttas, sii galget 10 beaivvi erremii go bohtet Norgii. 

Fuomáš! Dilli sáhttá fáhkkestaga rievdat, ja nu maiddái doaibmabijut. Dan birra dieđihit dáppe neahttasiiddus.