Dávjá jerrojuvvon gažaldagat (FAQ)

 Dása mii leat čohkken muhtin gažaldagaid maid oallugat jerret. Dáppe soaitá gávdnot vástádus maiddái du gažaldahkii.

Gos gávnnan dieđuid oahpuid ja sisabeassangáibádusaid birra?
- Dieđut gávdnojit min ruovttusiiddus ovttaskas oahpuid vuolde. Oppalaš lohkangelbbolašvuođa gáibádusat gávdnojit Samordna opptak siiddus.

Goas lea ohcanáigemearri?
- Dábálaš ohcanáigemearri čavčča oahpuide lea 15.4 ja giđa oahpuide fas 1.12. Ohcanáigemearri ohcciide geat ohcet reálagelbbolašvuođa dahje eavttuid vuođul lea 1.3 oahpuide mat álget čakčalohkanbajis ja 15.11 oahpuide mat álget giđđalohkanbajis. Jus ohcanáigemearri guhkiduvvo, de almmuhuvvo ođđa áigemearri min ruovttusiidui www.samas.no.

Mo ozan ohppui?
- Čavčča oahpuide ozat jogo oktasaš sisaváldima (Samordna opptak) dahje ohcanweba (Søknadsnweb) bokte, dat boahtá das masa ohppui aiggut ohcat. Eambbo dieđuid dán birra gávnnat min ruovttusiiddus.

Makkár duođaštusaid dárbbahehpet?
- Mii dárbbašit duođaštusaid ahte deavddát guoskevaš oahpu sisabeassangáibádusaid. Vuođđooahpuide leat dát dábálaččat oppalaš lohkangelbbolašvuohta (generell studiekompetanse) dahje reálagelbbolašvuohta ja sámegielgelbbolašvuohta. Eambbo dieđuid dán birra gávnnat min ruovttusiiddus.

Mo duođaštan ahte deavddán sisabeassangáibádusaid?
- Ohcanwebas (søknadsweb) sáhtát lasihit duođaštusaid go leat ohcan. Dáid lavttat ohcamii Mine dokumenter vuolde. Sáhtát maid dohkkehit ahte Sámi allaskuvla viežžá du elektrovnnalaš oahppoduođaštusa ja/dahje bohtosiid maid leat olahan eará alitoahppoásahusas. Oktasaš sisaváldimis sáhtát maid lasihit duođaštusaid go leat ohcan. Go leat ohcan, de boađát govvii mii čoahkkáigeassá du ohcama. Doppe gávnnat boalu "Se hva du må dokumentere".

Goas ja gosa boahtá vástádus ohcamii?
- Báikkálaš sisaváldimis boahtá vástádus 1.7 čavčča oahpuide ja 20.12 giđa oahpuide, dábálaš sisaváldimis. Rabas oahpposajiide almmuhuvvot vástádusat dađi mielde maŋŋel dieid dáhtoniid. Oktasaš sisaváldimis almmuhuvvojit vástádusat dábálaččat 20.7. Oktasaš sisaváldima rabas oahpposajiid vástádusat almmuhuvvot dábálaččat dađistaga maŋŋel go rabas oahpposajit leat almmuhuvvon.

Mo vástidan fálaldahkii?
- Vástidanáigemearit bohtet ovdan du ohcamis. Don vástidat vuogádagas man bokte ohcet, jogo søknadsweb dahje samordna opptak. 

Sáhtán go ja goas sáhtán ohcat doarjaga Norgga loatnakássas ja goas oaččun ruđaid?

- Jus deavddát Loatnakássa eavttuid oažžut doarjaga, de sáhtát ohcat doarjaga nu mo leat ohcan oahpposaji. Ohcan meannuduvvo go leat ožžon oahpposaji ja máksán lohkanbadjedivada. Sámi allaskuvllas manná diehtu dán birra Loatnakássii 1-2 beaivvi maŋŋel go leat máksán. Jus ohcan dohkkehuvvo, de bohtet ruđat maŋŋel go Loatnakássa lea ožžon dieđuid.

Geainna sáhtán váldit oktavuođa jus leat jearaldagat Sámi allaskuvlla oahpuid ja ohcama birra?

- Eanet ohcanrávvagiid sáhtát oažžut Sámi allaskuvlla oahppo- ja dutkanhálddahusas go riŋget +47 78 44 84 00 dahje sáddet e-poastta postmottak@samiskhs.no