Sámegiella ja sámi girjjálašvuohta 1 (BASA 1)

Oahppu gullá sámegiela ja sámi girjjálašvuođa bachelorprográmma fágaoahpuide, muhto heive buot sámegiellaberošteddjiide ja dutnje gii áiggošit bargat sámegielain. Oahpu bokte beasat huksegoahtit teorehtalaš ja fágalaš gelbbolašvuođa, mii dárbbašuvvo sámi servodagas iešguđet surggiin.

Praktihkalaš dieđut:

• Oahpahusgiella: Davvisámegiella
• Oahpahusbáiki: Sámi allaskuvllas
• Oahpahus lágiduvvo deaivvademiid bokte. Deaivvadeamit leat juohke nuppi vahku.
• 30 oahppočuoggá 
• Ollesáiggi oahppu ovtta lohkanbaji 
• Diibmoplána ja deaivvadanplána: TimeEdit
• Jus leat jearaldagat mat gusket oahpposajeohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain, oahppohalddahus@samas.no

Oahpu sisdoallu

Oahppu addá studeanttaide vuođđodieđuid ja -dáidduid sámegielas ja sámi girjjálašvuođas. Oahppu addá maiddái vejolašvuođa oahpásnuvvat sámegiela ja sámi girjjálašvuođa studeremii allaskuvladásis. Sámegiela teoriijavuođđu ja fágaperspektiiva viiddida studeanttaid áddejumi gielas ja iešguđetlágán teavsttain. Oahpus deattuhuvvo erenoamážit čálalaš ja njálmmálaš giellageavaheapmi.

Oahppu juhkkojuvvo golmma fáddájovkui maid guđege sáhttá lohkat sierra.

1) Davvisámegiela morfologiija ja cealkkaoahppa (SAM 102)

2) Sámi girjjálašvuođa vuođđokursa (SAM 111)

3) Davvisámi fonetihkka, fonologiija ja čállinvuogit (SAM 108)

Bargovejolašvuođat/čiekŋudanvejolašvuođat
Allaskuvla dási formála sámegielmáhttu lea buorre lassikvalifikašuvdna máŋggalágan bargguin. Dáinna oahpuin lea buorre álgit dakkár máhtu háhkat. Oahpu maŋŋá lea vejolašvuohta ohcat Sámegiella ja sámi girjjálašvuohta 2 -ohppui, mii álgá giđđalohkanbajis. Muhtin bargosajiin oaččut maiddái lassi bálkká jus lea 60 oahppočuoggá sámegielas.