Girječállioahppu 2 – Prosa ja muitalusat

Praktihkalaš dieđut:

• Oahppokoda: SÁM 192
• 10 oahppočuoggá 
• Bachelordássi
• Oahpu lágideapmi: Deaivvadeamit leat juhkkojuvvon fysalašdeaivvadeapmin Diehtosiiddas (ja vejolaččat eará báikkiin) ja neahttaoahpahussan.Sámi allaskuvla lágida kurssa ovttasráđiid Sámi Girječálliid Servviin.
• Oahppoplána
• Diibmoplána ja deaivvadanplána: TimeEdit
• Jus leat jearaldagat mat gusket oahpposajeohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain, oahppohalddahus@samas.no

Oahpu sisdoallu

Girječállioahppu 1-3 lea jurddašuvvon olbmuide geat háliidit oahppat girječállima, ovdánahttit čáppagirjjálaš čállindáidduset ja hárjánit árvvoštallat girjjálašvuođa teavsttaid. Danin vuoruhuvvo čállin iešguđetge šaŋŋeriin. Oahpahus lea máŋggabealat, ja dasa bovdejuvvojit guosselogaldallit lassin kursalágideddjiide. Studeanttatgalget oahpásmuvvat iešguđetge čállinšlájaide/ šaŋŋeriidda, ja sii besset ieža iskat čállit sihke šaŋŋerrájáid siskkobealde ja šaŋŋer-rastideaddji teavsttaid.

Oahpahus lea maiddá girječállima giellageavaheami birra ja oahpásmuvvan sámi čállima historjái ja máŋggabealatvuhtii, ee. girjjálašvuođa ođđa almmuhanvugiide, dego slam, spoken word ja digitála girjjálašvuohta.Iešguđetgeoasis oahpus deattuhuvvojit moadde čállinhámi erenoamážit. Oahppu addá čállinhárjáneami mii lea ávkin sihke čáppa-ja fágagirjjálaš čállimii. Kurssas oahpásmuvvá iešguđetge čállinšlájaide maid sáhttet atnit ávkin sihke journalisttat, lágádusbargit, olbmot geat barget kulturealáhusain, girjerájusbargit ja oahpaheaddjit.

Girječállioahppu 2 čiekŋuda erenoamážit sámi prosateavsttaide, sihke otnábeaivvi noveallaide ja románaide, ja maiddá eará šáŋŋeriidda dego esseija. Dasa lassin giehtadallojit máidnasat ja muitalusat, ja daid fuolkevuohta prosai.

Oahppoprográmma gullevašvuohta
Oahppoovttadat lea oassin Girječállioahpus1-3, mii oktiibuot dahká 30 oahppočuoggá. Girječállioahpuslea vejolaš váldit juohke 10 oč kurssa sierra. Oahppu lea dohkkehuvvon doarjjafágan Sámegiela ja sámi girjjálašvuođa bachelorprográmmas ja sáhttá maid dohkkehuvvot doarjjafágan eará bachelorprográmmain.

Oahpahus - ja eksámengiella
Váldo oahpahusgiella lea davvisámegiella. Eará sámegielat, skandináva gielat ja eaŋgalasgiella sáhttet geavahuvvot oahpahusas. Oahpahus davvisámegillii ja eaŋgalasgillii ii dulkojuvvo. Eará gielaid oahpahus dulkojuvvo dárbbu mielde.
Eksámengiella lea dábálaččat davvisámegiella, muhto sáhttá rahppot vejolašvuohta čállit eksámena eará sámegillii ge.

Oahpahan - ja oahppanvuogit
Oahpahus lea čoagganemiid bokte. Lea maid vejolaš ahte muhtun deaivvadeamit leat digitála hámis. Studeanttat galget čállit teavsttaid deaivvademiid gaskkas ja sáddet daid fágaoahpaheddjiide ja mielde-studeanttaide kommenteremii vai olles joavku beassá čoagganemiid oktavuođas ságastallat ja árvvoštallat ja evttohallat buoridemiid teavsttaide. Teakstabájit main studeanttaid iežaset čállosat guorahallojuvvojit dárkilit leat guovddáš oassi oahpus. Dasa lassin leat logaldagat mat čilgejit girjjálašvuođa šlájaid, čállinhámiid ja árvvoštallanvugiid.

Vurdojuvvo ahte studeanttat leat aktiivvalaččat mielde ságastallamiin iešguđet teavsttaid guorahallamis.

Eksámen
Eksámen lea ruovttueksámen mas studeanta gárve teavstta dahje teavsttaid maid lea čállán oahppoáiggi, jogo:
• 6-12 siidosaš prosateavstta, jogo novealla, románas oassekapihttala dahje esseija, dahje
• 6-12 siidosaš muitalusa dahje muitalusaid mat lea hábmejuvvon árbevirolaš vuogi mielde.

Eksámen árvvoštallojuvvo ceavzán/ ii ceavzán.