BA - Prográmma

DUO Duodje- ja hábmenbachelor

Bilde av bachelorstudent i duodji, Laila S. Kuhmunen

Duoji bachelorstudeanta Laila Susanna Kuhmunen. Govven: Mattias Sikku Valio

  • Oahpahusgiella: Oahpahangiella lea dábálaččat davvisámegiella, muhto ovttaskas fáttáin sáhttá oahpahus leat eará sámegielaide, dahje eará gielaide. Eará sámegielat studeanttaide láhččo dilli nu ahte sii sáhttet čállit bargguid iežaset sámegillii.
  • Oahpahusbáiki: Sámi allaskuvla
  • Bacheloroahppu- ollesáigeoahppu 3 jagi
  • 180 oahppočuoggá
  • Prográmmaplána
  • Programplan norsk versjon

Sisdoallu:
Bachelorprográmma bistá golbma jagi ja lea 180 oahppočuoggá, mii sisttisdoallá 30 oč oktasaš vuođđooahpuid, 60 oč duoji fágaoahpuid, 20 oč fágalaš čiekŋudanoahpuid, ja 60 oč doarjjafágaid mas okta fágaviidodat galgá leat 30 oč.  maid studeanta ieš vállje ja maid allaskuvla dohkkeha prográmma oassin.  

Bachelorprográmmas lea vuolggasadji duddjon,- ja hábmenvugiin, estehtalaš vásáhusain ja teorehtalaš reflekšuvnnain. Studeanta ahtanuššá oahpus go beassá hárjehallat ja  reflekteret iežas bargguid ja teoriijaid vuođul. Bachelorprográmma deattuha duodjefágalaš čuolmmaid ja čovdosiid mat dorjot ekologalaš, kultuvrralaš, sosiálalaš ja ekonomalaš bistevašvuođa.Oahppu deattuha duodje- ja hábmenproseassaid  main studeantta dovddiida duodjái, ja mas beassá ovdánahttit iežas duodjebuktaga ja ámmátlaš hálddašeami. Duddjon, reflekšuvdna, vásáhusat, duodje- ja dáiddalaš čehppodat ja buktagat deattuhuvvojit, ja teorehtalaš ákkastallamat ja jurddašeamit galget doarjut duddjon- ja hábmen bargguid. Oahppu addá vuođđodieđuid sámi ja eará álgoálbmogiid duodje- ja dáiddadieđus. Oahppu addá studeanttaide hárjáneami geavahit sámegiela go galget buktit ovdan iežaset vásáhusaid duddjomis, ja go galget dieđalaččat ákkastallat bargguid.

Doarjjafágaoasi fágat

Fáttát/oahput maid ieš vállje, nu ahte dahket oktiibuot 60 oč. Doarjjafágaid sáhttá válljegoahtit njealját lohkanbajis. Doarjjafágaid sáhttá maid váldit eará universitehtain dahje allaskuvllain, dainna eavttuin ahte Sámi allaskuvlla DOS- stivra dohkkeha daid oassin duoji bachelorii. Buot fágat/ávdnasat berrejit válljejuvvot nu, ahte dorjot studeantta ahtanuššama ja fágalaš oktiigullevašvuođa. Doarjjafágain galgá okta fága unnimusat leat 30 oč. 

Doarjjafágat maid Sámi allaskuvla fállá leat:             

Duodji 2, 30 oč
Duodjediehtu ja sámegiella  (10 oč)
Duoji ja dáidaga/hábmema hálddašeapmi (10 oč)
Duodji, beaggin ja márkanfievrrideapmi (20 oč) (Duodji ja haddebidjan (5 oč))
Duddjon- ja sámegiella (15 oč)
Duodji ja julevsámegiela teoriija/giellageavaheapmi duojis (10 oč)
Duedtije jih åarjelsaemien giele (Duodji ja máttasámegiela teoriija/giellageavaheapmi duojis) (10 oč)
Sámegiella fágat ( 30-60 oč)
Gálvodujiid buvttadeapmi (15 oč)

Bargo- ja joatkkaoahppovejolašvuođat

Bachelorgráda addá vuođđogelbbolašvuođa álgit Duoji masterii. Jus lassin lohká, Praktihkalaš pedagogalaš oahpu (PPO), de oahppu addá oahpahangelbbolašvuođa duojis dahje hábmemis vuođđoskuvllas, joatkkaskuvllas ja rávisolbmuid oahpahusas. Bachelorgráda addá vuođu bargat ásahusain main duodji/dáidda/hábmen lea guovddážis, omd. duodjeásahusain, museain, kulturskuvllain, ja teáhteriin, dahje  jođihit iežas duodje- dahje dáiddafitnodaga.

 

Maŋemuš rievdaduvvon 02.03.17

 

Sisabeassangáibádusat

Vuođđooahpuid oppalaš sisaváldingáibádusat Sámi allaskuvlla leat oppalaš lohkangelbbolašvuohta dahje reálagelbbolašvuohta ja sámegiella (jf. Forskrift om opptak til høyere utdanning).

Sámegiela gáibádusa sáhttá deavdit čuovvovaš vugiid mielde: Norgga joatkkaskuvllas sámegiella 1. dahje 2. giellan 2, Suoma logahagas eatnigielladutkkus dahje guhkes amasgielladutkkus ja Ruoŧa gymnásas eatnigiellan (modersmål 200 čuoggá) dahje ođđaáigásaš giellan (moderna språk 200-300 čuoggá) dahje vástideaddji sámegieloahppu doaibmi njuolggadusaid mielde. Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit giellageahččaleami maid Sámi allaskuvla lágida. Jus lea eahpesihkarvuohta man dási gelbbolašvuohta ohccis lea, de ášši ovddiduvvo fágalaš árvvoštallamii ja meannuduvvo dán vuođul.

Lassin galget ohccit sáddet sisa 8-10 gova dujiin ja daid detáljjain.
Govaid bijat ohcanvuogádagas ohcama fárrui dahje sáhtát sáddet studieadm@samiskhs.no čujuhussii.

Koordinator

brittaml's picture
Marakatt-Labba, Britta
E-mail: 
Britta.Marakatt-Labba@samiskhs.no